爆料！英國老牌歌手Sting想嗒露雲娜

資深音樂人聶安達（Anders Nelsson）為10月的首個演唱會《我愛香港Anders Nelsson In Concert》舉行記招，獲露雲娜、潘芳芳及老公、尹光、陳欣健等到場支持，期間他獻唱多首名曲，最後大家合唱。受訪時講到聶安達和露雲娜是「契父女」，聶安達表示露雲娜未出世已經識她：「佢喺阿媽個肚入面我已經識佢，睇住佢大。」

聶安達更大爆料，透露當年他和露雲娜一起去南美洲智利出席歌唱比賽，同場有外國樂隊The Police，笑住踢爆當年主音Sting借醉想嗒露雲娜：「我即刻幫手推開佢，佢嗰陣啱啱18歲咋。」露雲娜即笑不停：「佢係好鹹濕！嗰陣我18歲，卜卜脆呀！（佢點樣鹹濕？）唔敢講，佢好鹹濕。（摸你？）唔講啦。」

露雲娜表示到時會做嘉賓，到時兩人會合唱，而到時亦會有Christine Samson等人做嘉賓，但另外其他嘉賓聶安達就保持神祕：「有啲可能會坐喺觀眾席，到時又唔知陳欣健會唔會有時間一齊嚟唱歌。」講到開一場不夠喉，聶安達笑言：「所以我7點45分開騷，老闆話我好多嘢講，叫我到時講少啲，但我好難。」露雲娜就笑言對方到時一定會喊。聶安達又謂這幾個月特地搵番很多舊相出來：「我由12歲Form 2開始夾band，唱咗60年歌，老闆叫我搵番啲舊相出嚟，到時喺騷度播出嚟。」