男人天敵！羅天宇王宗堯緋聞女友個個索

有時呢，天就係好唔公平！學鍾欣潼金句：「個個都拍拖，唔通個個都想拍拖？」有啲人想拍拖，但就單身一萬年！有人就桃花不斷，有好多靚女埋身，令人羨慕！今次東網就同大家數數娛圈中嘅男人天敵，佢哋身邊嘅女伴個個都樣靚身材正，單身嘅男士真係唔恨得咁多喇！

第一個，一定係無綫藝人羅天宇！佢可以話係女神殺手，同傳過拍拖嘅，個個都樣靚身材正！佢最勁就係同過顛峰時期（狀態最好）嘅苟芸慧拍拖，呢對姊弟戀維持得唔耐，最後都係分手收場。之後佢同上位花旦湯洛雯拍拖，佢哋兩個多次畀人影到拍拖，但佢哋都係好低調唔認戀情，直到羅天宇30歲生日，當時流出咗湯洛雯送「肉嘴」賀壽嘅相，先至肯公開戀情！但可惜都分手收場，四年情就咁玩完，仲有指分手後羅天宇，極速撻着另一位女神陳瀅呀！另外，佢仲同過高海寧、蔣家旻傳過緋聞！

第二位，要數到王宗堯嘅現任與歷代，都係不得了！同大家數數就明白！佢現任係前As One成員Chloe，Chloe依家先24歲非常嫩口，佢最近拍咗個廣告，大家仲讚佢似周慧敏！同佢拍過拖嘅仲有，陳靜（Dada）、「浸大E神」Carol楊梓瑤、?模黎紀君（Christy），佢哋有咩特點？咪都係身材好惹火囉！

第三位，係張建聲呀，佢憑網劇《反黑》角色「招積」彈起，緋聞方面，佢「戰績」彪炳！佢同過模特兒陳嘉莉拍過拖，甩拖之後話佢撻過「籃球女神」方詠琳，但冇耐又話分咗手，好亂呀！