影后葉童見康城影帝馬些路方堤變小粉絲

曾奪影后的葉童、名模貝安琪出席意大利電影週揭幕禮，同場與康城影帝、開幕電影男主角馬些路方堤影三人合照。連續參加盛典3年的葉童受訪時表示意大利電影同香港電影不一樣，內容上會描述得更加深入，自己都有趁機會偷師：「佢哋唔會針對票房，而係希望拍到啲藝術片、人性化嘅電影，雖然語言上會有隔膜，但每次都睇得好開心，入面啲女仔都係有血有肉，對女性電影仍然充滿希望。」

提到剛完成7場舞台劇，葉童話對現場演出更感興趣，又大爆演出時的「蝦碌」事：「條裙不停勾住張櫈，第一次好驚，惟有甩開張櫈，好彩我個角色係有妄想症，啲動作觀眾都好接受，到最後一場又勾住咗，就係咁拍櫈，出到嚟效果都好好。」她又講到做完舞台劇之後好希望做幕後工作，想做導演去學校教學生做戲：「雖然冇考文憑，但根據我咁多年演出經驗，加上攞過幾個獎，我諗都可以勝任到。」

問到是否做舞台劇做上癮？葉童笑話唔可以咁講，不過希望之後可以同香港出名的劇團合作：「話劇係種修煉，可以令演員有更好發揮。（有咩人想合作？）冇諗到咁遠，睇眼前，每次都係機會、緣分，自己都會珍惜。（既然想教學生做戲，之後會去深造？）有人提議過，而喺入行前自己都有諗過，如果真係做導演，我會去讀深造班，去睇吓啲教師會點教。」