北上唱歌有前途 G.E.M.嗌出新天地!

20180915
東網電視
更多新聞短片
好多北上唱將!

少香港歌手亮相內地歌唱比賽節目引起迴響,其中曾被黎明力捧嘅女歌手JC(陳泳彤)參加《中國好聲音》,獻唱成名曲《說散就散》打破「紅歌唔紅人」宿命,而許靖韻亦憑《創造101》人氣急升。其實近年都有好多北上比賽跑出嘅成功例子,有人身價幾級跳暴升,更有人紅到「衝出國際」。

G.E.M.

要數內地爆紅嘅歌手,一定唔少得鄧紫棋(G.E.M.)。佢喺2014年參加內地節目《我是歌手》第二季,當時喺內地籍籍無名嘅佢單單喺第一集表演完就即時爆紅,最後仲順利奪得亞軍。比賽帶挈佢人氣飆升,商演巡唱接唔停,更成功揚威海外,喺2016年入選美國雜誌《福布斯》年度「30 Under 30」榜,被選為30歲以下最具才華的未來領袖之一。佢最近更成功「升LV」,夥拍台灣歌手潘瑋柏為內地節目《中國新說唱》擔任導師。

Gin Lee

由馬來西亞來港發展的歌手李幸倪(Gin Lee)星路一直浮浮沉沉,直至2015年參加《中國好聲音》第四季,成為台灣天王周杰倫戰隊成員躋身十強位置,成功翻身!人氣爆燈嘅佢仲獲唱片公司青睞,強勢回歸香港樂壇出碟,橫掃多個頒獎禮嘅歌曲及歌手獎外,今年仲首次踏上紅館舞台開個唱添!

黃貫中

歌手黃貫中(Paul)喺2013年參加內地歌唱比賽《我是歌手》,成功擴大內地市場,唔單止keep住舉辦內地巡唱,今年更孖住老婆朱茵及囡囡黃鶯參加內地真人騷《想想辦法吧爸爸》,仲有傳佢哋一家三口嘅酬金高達千萬人民幣。

MC Jin

歐陽靖(MC Jin)喺rap界相當出名,佢2017年轉戰內地,蒙面化名「Hip-hop Man」參加內地饒舌選秀節目《中國有嘻哈》,成功引起關注即時爆紅,並令佢喺rap界再上一層樓,獲內地《2017放肆一下移動視頻風雲盛典》頒發「年度嘻哈音樂典範人物」。此外,佢亦成為內地節目嘅寵兒,唔單止喺今年為節目《偶像練習生》擔任導師,仲帶埋囝囝拍攝親子真人騷《童話俠》。

杜麗莎

歌后杜麗莎喺2016年亮相《跨界歌王》擔任王祖藍嘅幫唱嘉賓,之後再下一城,2017年參加《歌手2017》同林憶蓮進行師徒對決,成功打入內地市場,唔單止同年再上節目《金曲撈》擔任嘉賓,之後再獲邀到內地大學做講師,教授學生正確用聲方法,大受年青人歡迎。

容祖兒

天后容祖兒2016年參加《我是歌手》第四季,因為與同樣喺天后級嘅李玟力爭歌后寶座,而令佢人氣再度爆登,旋即受到大量綜藝節目嘅邀請,先後參加錄製《我想和妳唱》、《全員加速中》及《飯局的誘惑》等節目,更為《戀愛先生》、《解憂雜貨店》等多套大熱電視電影獻唱主題曲。

李克勤

歌手李克勤本身喺內地已經為人熟悉,佢2015年再因為蒙面化身「白棱鏡」,參加節目《蒙面歌王》勇奪歌王而再創高峰。及後,佢再憑參加《我是歌手》第四季,吸納大量內地歌迷,成功令佢喺《第四屆粵語歌曲排行榜頒獎典禮》入面橫掃「最受歡迎歌曲」、「至尊專輯」以及「樂壇至尊歌手大獎」等三個大獎,更有指佢騷價升至150萬人民幣(約172萬元港幣)一集,認真名利雙收!