欠落人情！徐小鳳尾場沈祖堯大開金口合唱

殿堂級歌手徐小鳳共六場假紅館《金光燦爛徐小鳳演唱會2018》今晚尾場，Encore時間分別邀請了兩位「校長」上台，第一位為香港中文大學前校長沈祖堯，着到西裝骨骨的他帶同鮮花上台，徐小鳳答謝對方可以成功趕到飛機回港出席尾場騷，又搞笑話由沈祖堯獻上的鮮花「熟口面」，十足似剛才嘉賓之一「急智歌王」張帝送上的一樣，惹來全場爆笑！又問對方點解瘦了一圈？沈祖堯即口花話花：「原因係想念你！」氹到徐小鳳眉開眼笑！當沈祖堯想離開時，徐小鳳就拉住唔畀走，笑話：「佢成日碌我卡（人情卡），上年年尾話就嚟退休，請我去聽佢唱我首《順流逆流》，點知去到原來要同佢合唱！今晚就碌吓佢！合唱你唯一首飲歌《小李飛刀》！」沈祖堯原本想以「冇準備」為由拒絕，但最後都乖乖唱，演唱期間表現輕鬆，單手插袋又同徐小鳳擊掌，仲差啲踩中她的裙尾，非常驚險！

第二位校長則是全場有份幫手表演，包括管弦樂團、合唱團、鼓團、一年級小司儀所屬學校的林校長，林校長笑問徐小鳳初次動用過百名小學生唔驚？見慣大場面的徐小鳳就話：「佢哋嘅才華不可埋沒，驚都係你哋驚，原本淨係邀請管弦樂團，後尾愈請愈多，但我嘅貪心係冇錯。」林校長仲多謝番徐小鳳轉頭：「班學生中文好咗，你啲歌嘅歌詞好靚；佢哋睇少咗醫生，因為成日笑；同長輩關係好咗，成日唱你啲歌，零距離。」徐小鳳亦不忘自誇：「唔識中文真係唔識唱我啲歌！」說畢林校長就頒發小學畢業證書給徐小鳳以示答謝：「我哋係男校，你係唯一一個男校女生！」徐小鳳即搞笑話：「我係咪畢業啦？好榮幸！」

接着再次請到「寶島歌王」青山及張帝呢兩位「情敵」上台，甫上台徐小鳳就先話要同張帝握手，因為怕對方呷醋！兩位嘉賓表示今次認真大開眼界，張帝更形容是一個家庭同樂會，而徐小鳳就突然自爆做歌手表面上看似堅強，但內心其實好內弱，如果不是有觀眾的掌聲，都不敢行出來表演！最後三人合唱經典金曲《喜氣洋洋》，為個唱畫上完美句號，於11時15分正式完場。

----------------------------

東網巨星開咗ig喇，大家快啲follow啦！

https://bit.ly/2JjSVcr