話家英哥好彩　汪明荃揮劍劈傷黃淑儀眉頭

藝人汪明荃（Liza）出席「善心滿載仁愛堂」記者會，因老公羅家英在馬來西亞拍攝賀歲電影時發生火災，戲中演員楊盼盼燒手面部燒傷及廿多人受傷，當時在場的羅家英幸好未有受傷，Liza表示家英已向她報平安，並稱將傍晚6、7點返港：「睇到報紙報道都有啲恐怖。（好多人燒傷？）場火嚟得好快，當時場戲佢冇份，所以坐開咗！」

提到楊盼盼面部燒傷，Liza謂：「燒到臉就好嚴重，因為會冇咁快好得番，但盼盼好勇敢，而意外嘅事冇人想發生，其他人都傷咗手同腳，家英哥就好好彩冇傷到。」

Liza稱當年拍《書劍恩仇錄》都有出意外，與黃淑儀揮劍對打，她就誤傷了黃淑儀眉頭， 當時新人不懂揮劍的力量，自己都過意不去。問到可有擔心家英哥致失眠？Liza說：「 咁有冇，反而前一晚打風就真係瞓唔着，個風好勁，漏夜啲窗再貼過膠紙，不過好彩都冇乜嘢損毀到。（家英有冇擔心越洋打畀你？） 佢都有打返嚟問屋企有冇事！」她稱去年颱風令後山冧沙泥，搞到露台成地沙、雨水去到膝頭，最後要打爛玻璃放水。」

問到羅家英可需再回馬來西亞拍攝？她稱應該戲份已拍畢，之後他亦準備要做大戲。