邀請張致恒同居　關智斌豪宅曝光

藝人關智斌（Kenny）同張致恒（Steven）向來老友鬼鬼，呢日Kenny就邀請Steven上佢屋企「同居」一日，Steven就同大家分享短片，帶大家嚟個Kenny屋企Home Tour。

豪宅果然係唔同啲，連個大堂都寧舍高級，最搞笑係Steven笑Kenny喺屋企都着住鞋，搞到Kenny即刻為自己平反大嗌：「係造型嚟！」Steven再追擊：「咁又係，關智斌去到邊都要有造型。」入屋坐都未坐，兩個已唇槍舌劍，呢啲就真係Friend底喇。Kenny先帶Steven參觀書房，原來Kenny係一個好鍾意睇書嘅人，佢仲指近來自己愛上煮嘢食，所以買落好多烹飪書。

不過，Kenny間睡房先係重頭戲！佢間房有個小型衣帽間，仲有一個位專門用嚟擺放佢收藏多年嘅模型，位置擺得非常整齊，有啲仲連拆都未拆，相信呢度絕對係唔少男士嘅烏托邦呀…之後Steven就大爆Kenny好自戀，原來喺床嘅側邊有一幅Kenny嘅大相！Steven大爆：「佢有個習慣，人哋話好嘅嘢，佢就會即刻買。」之後Kenny再帶大家睇埋個洗手間同欣賞山景嘅露台，佢仲話平時自己會喺度食早餐，真係好識享受人生！

最後佢兩個嚟個Boy's talk ，Kenny問Steven點解咁鍾意遲到？Steven就話：「每個人心中都有個時間。」Kenny即刻笑話：「你個時間永遠比人慢啲。」其後又大爆二人同居時屋企有異味，原來佢哋將粉絲送嘅食物放埋咗一邊，搞到過晒期都唔知。好多網民都大讚Kenny間屋好靚，仲話裝修好有品味，最緊要係佢兩個嘅兄弟情冇得頂，好想再睇下集呀。

網民有話兒：

Toxx 5678：拍多啲BOYZ嘅嘢啦！真係好想再睇多啲！

Risdxx lvxx：仲有冇下文㗎，好睇喎，拍多啲呀！

Qiosddcccc maasdx：佢兩個嘅兄弟情，真係冇得頂，好想再有下集呀！

jxxxbxx：我又要同Kenny同居。