楊張新悅寸爆薛芷倫過度P圖：好傷心變膠面

名媛楊張新悅與藝人袁詠儀（靚靚）1997年時拍戲而鬧不和，一度勢成水火，事隔21年，薛芷倫日前於社交網站上載三人合照，袁詠儀與楊張新悅成功破冰！

楊張新悅出席活動，問到與靚靚破冰，她反覺得張相被P圖，極不自然：「好慘，張相P到我哋好膠面，其實我哋皮膚本身都好好，唔使P，膠面好核突，依家唔需要住，過多廿年先。」

楊張新悅坦言廿年冇見過靚靚：「拍完戲之後冇見過，我都十幾年冇拍戲，當年嘅事唔記得啦，我哋當晚有傾偈，大家以媽咪身份傾湊仔經，我同靚靚都係好爽直嘅人，唔係你哋眼中講到咁。（大家有冇交換電話保持聯絡？）唔需要交換電話，依家網上咁容易搵，要搵對方一定可以搵到，唔使太刻意，大家都忙，我連自己啲朋友都唔得閒搵。（今次係咪芷倫拉攏二人破冰？）從來都冇需要話拉攏一齊，只係依家大家都興自拍，影完呢個就影嗰個，我只係好傷心張相係大膠面。」

薛芷倫嬲爆反擊

楊張新悅怨爆被膠面，薛芷倫接受東網電話訪問，談到被指P圖一事，她否認：「我就冇P過圖，我用咗電話上的美顏App影selfie，我點得閒做啲咁嘅嘢，我唔會做啲唔尊重人嘅事，亦都冇P人哋個樣。（楊張新悅言下之意好似話你P圖喎？）我唔想再同呢個人講落去，本來都係一個開心飯局，大家可以同枱食飯係緣分，大家當時有傾偈又玩自拍，影完大家都有睇相，玩得好開心，我唔想無事生非，唔想再回應。」問到會否與楊張新悅絕交？她沒好氣說：「總之都係嗰一句，能夠同枱食飯、都係一個緣分，我隨緣啦。」

薛芷倫補充說：「大家都咁忙，咁多正經嘢做，佢又要忙住湊四個細路，我又要忙住投資生意口嘅嘢，我都冇時間去P佢張圖，一幅自拍照何足掛齒，希望佢擺低件事，只不過一張相，一張一齊玩嘅自拍照，希望佢Let It Go！」