【挑機羅嘉良】郭晉安爆笑反串Diana

講起「阿旺」，大家會諗起郭晉安（安仔），因為當年佢喺劇集《戇夫成龍》同《阿旺新傳》中將角色「阿旺」演繹得淋漓盡致，仲憑呢兩套劇及《忠奸人》三度封為視帝。最近，安仔喺熱播劇《再創世紀》中飾演「賀天生」一角，更被網民激讚奸到出汁，紛紛估佢今屆會唔會再稱帝！

呢日，See See TVB就上載咗一段安仔當年扮羅嘉良喺《先生貴性》中經典嘅女性造型「Diana」嘅片段，片中安仔與羅嘉良同台演出。一開頭，羅嘉良獨自喺台上獻唱，點知安仔突然驚喜現身，仲打扮成「Diana」咁款！安仔以攣髮配珍珠耳環、西裝套裝襯絲巾，造型已經係100分！佢仲主動捉住羅嘉良跳舞，向對方獻花，相當熱情！當自我介紹時，安仔更以蘭花手自我介紹：「我唔係郭晉安，我係Flora個妹陳慧散。」而佢見到主持李克勤時，仲即刻發晒姣搭住對方，認真抵死！

唔少網民大讚安仔無論聲線、神緒同動作，都演繹得出神入化，絕對可以同羅嘉良嘅「Diana」媲美！另外，亦有網友更大讚安仔扮女人扮得好過羅嘉良，繼「阿旺」之後，最期待佢扮演女人，仲話睇好佢今次再奪視帝之位！

網民有話兒

Kxxo Fxxg：郭晉安這個扮相個樣，令我想起廖偉雄（亞燦）嘅乜太扮相，個樣有三分似

Juxx Nxxxx：靚過乜太好多啊??

Chxx Hxxg Cxxn：造型唯俏唯妙！頗有特首的味道呵！

Anxxx xxn：郭晉安好靚女