為「事業」做好準備？楊鎧凝學魔術勁快上手

童星楊鎧凝（Celine）年紀輕輕就多才多藝，除咗演戲唱歌樣樣精，好學嘅佢仲不斷發掘新嘅興趣，呢日佢就孖住童星趙啟嵐（Matt），齊齊去到香港魔術學院舉辦嘅魔術興趣班活動「拜師學藝」，主辦單位仲專誠請嚟韓國著名魔術師李明俊擔任客席導師。活動上見Celine同Matt都非常投入，而且好快就上手，非常有天分。Celine表示今次學魔術係希望可以喺未來嘅電視劇或電影上應用得到，佢仲話：「魔術好得意，我其實從來都未接觸過魔術，所以今次都覺得好好玩同好實用。」至於Matt就表示想透過魔術將愛同正能量送畀所有人。