《愛．回家》Terry做IT狗　網民讚勁貼地

無綫處境劇《愛．回家之開心速遞》驚喜連連，最近有一集命為《我是IT狗》嘅劇情道盡唔少IT友辛酸，引起網民激烈討論！飾演「Terry」嘅李偉健因為被舅父安排加入IT部，講明只係識開機同關機，仲話：「我以為IT部好得閒添，日日都有好多時間打機！」搞到阿頭Ivan眼都凸埋！而佢嘅同事啲花名全部都同電腦有關，分別係Keyboard、CPU、Mouse，個個都着宅男招牌格仔衫同埋四眼，又怕同人講嘢閃閃縮縮！但Terry竟然唔識做咁問：「點解佢哋着衫Style差唔多，係唔係制服？」令到IT部同事都忍唔住喺Chatroom鬧爆Terry！Ivan又教佢如果遇上整唔掂嘅電腦，可以講啲懶係複雜深奧嘅IT專有名詞，再拎部機返IT部搞就得！

為咗更融入IT部，Terry放低「偶像包袱」除去西裝，轉着格仔恤衫，脫胎換骨變咗宅男，仲改埋名叫Wi-Fi！但唔只個Look換咗，連行為舉止都變埋，竟然唔慣同人講咁耐嘢！

而一次嘅威龍百貨遭黑客入侵，竟然令成個IT部同事大開金口，本身官仔骨骨嘅Ivan仲着番格仔衫，仲齊齊發威嗌口號：「我哋係IT人，唔係IT狗！」Ivan仲講咗唔少金句：「真係當我哋IT狗呀？得個做字，每年加人工加得最少，炒人就即刻諗起我哋！」、「我哋唔好咁快否定自己嘅專業，總有地方需要我！」最後仲上演《廿二世紀殺人網絡》（Matrix）經典一幕，成功清除所有病毒，威番次！

喺現實中，唔少IT人都會被叫IT狗，覺得佢哋係公司冗員，無所作為，所以網民都話呢集好貼地，大讚好高質，雖然係小品，但短短半個鐘都已經好爆笑，又笑問個編劇係咪黐咗線呀！