祖兒阿詩破冰！劉浩龍勁驚青前言不對後語

天后容祖兒（Joey）與何韻詩日前的「世紀破冰合照」，成功掀起連番討論，陪Joey一同前往日本的劉浩龍（師兄）就低調冇出鏡。

有去定冇去？

今日師兄出席節目《星光熠熠耀保良》的拜神儀式，甫受訪他先自言好緊張，因為今晚會表演跳舞，笑話今年變成了跳唱歌手，日日都練舞，又大呻好辛苦，問到日日練舞都抽到時間去日本旅行？他即大反應反問記者：「我有去日本咩？都睇到幅相話我去日本，朋友與朋友之間影相我就唔作出回應喇。」再追問是否同行到日本時，師兄緊張到開始前言不對後語，更留下「蛛絲馬迹」：「冇呀！我自己同啲朋友去咋嘛！（自己同朋友去？都有去日本？）有！我同啲朋友去食飯。（圈中朋友定圈外朋友？）我喺街度撞到楊千嬅囉！（你有冇撞到Joey佢哋？）冇喎！我冇去到支持明哥（黃耀明），嗰晚我要去食飯，都係Message佢，支持佢Good Show。」

「呢份友誼好值得鼓勵」

問到對「世紀破冰合照」的評價？師兄無奈話：「其實我覺得影張相好平常，喺一個開心嘅環境，大家一齊支持明哥，代表香港歌手好支持明哥，呢份友誼同支持好值得鼓勵。」問到為何他又不去支持明哥？師兄就重申當晚約了朋友食飯，所以撞時間去唔到。