鄺文珣復出拍劇　鮑起靜有料爆

藝人鮑起靜（鮑姐）、鄺文珣（May）同傅楚惠喺深水埗拍攝劇集。講到飾演義工嘅May同楚惠去到深水埗派飯，遇見並幫助飾演以執紙皮維生嘅婆婆鮑姐，故事非常貼地。

講到May好多年冇拍劇，點解今次會接拍？May話：「因為自己有做一個慈善計劃幫助內地孤兒，覺得呢個劇本同自己嘅理念好似，亦寫得好感動，加上知道可以同鮑姐合作，所以就應承接拍。（老公有冇咩意見？）佢都覺得劇本好好，大家都希望觀眾可更了解基層嘅生活和需要。」問到之後會唔會繼續拍劇？May話會考慮：「但係依家始終有家庭，都會將佢哋放喺首位考慮先。」期間鮑姐更大爆May大仔照顧妹妹嘅蝦碌事：「因為May要開工，大仔就幫手照妹妹，點知佢唔識幫佢換尿片，最終因為太重，成條尿片跌咗落嚟，好搞笑。」

講到今次三人首次一起合作，May大讚鮑姐毫無架子：「佢真係好好人又專業，所以合作完全冇壓力，非常開心。」楚惠就讚鮑姐親切，佢話：「成日請我哋食嘢，今日我嚟到，發現有個婆婆請我哋食燒肉，原來係鮑姐！」鮑姐亦指今次合作相當開心，大讚佢劇中造型夠逼真：「佢哋好心機設計呢個造型，妝髮都做得好好，連啲牙都油黃埋。」