律師版劉亦菲　陳復生囡囡麥景榕闖娛圈

息影藝人陳復生（Katie）曾表示身邊好多朋友想佢嘅子女加入娛樂圈，仲話會等佢哋讀完書後自由發展。囡囡麥景榕（Michel）早前港大法律系畢業，近日以玩票性質在幕前工作，為無綫資訊節目《一帶一路醫藥行》擔任嘉賓主持。

現年24歲嘅Michel相當有明星相，曾經被指係「翻版劉亦菲」，原來在求學期間已經不時有人邀請拍戲，更有北京導演有意搵佢拍攝古裝劇，不過自己對法律有興趣，所以當時就選擇以學業為先。

媽咪靚得嚟刁蠻

提到做主持嘅趣事，Michel表示上月跟隨攝製隊走訪新加坡、捷克、匈牙利等多個國家，直言好好玩：「因為讀書成日坐，試過考試時坐足20小時，但做主持可以行來行去，多啲郁動。」問有冇睇媽咪舊作偷師？Michel笑言：「望過吓，因為平時都對住佢。（覺得媽咪如何？）靚得嚟性格有啲刁蠻。（可想過去選美？）屋企唔贊成。」

對於囡囡做主持，Katie指因為見佢完成學業，加上對呢行有興趣，所以畀佢試吓：「有興趣就要support（支持），如果試都唔畀試就好唔公平，就算試咗佢都未必鍾意做幕前。」Katie其實唔太想囡囡做幕前：「希望佢試過之後會乖乖哋返去做律師。」

擇偶要同婆婆啱Key

Michel現時沒拍拖，至於擇偶條件，她說：「最緊要同我婆婆啱Key，有愛心同埋煮好味道嘅嘢食畀我就得喇！」至於跟爸爸何東舜銘已經好多年沒見面，沒有甚麼特別感覺。而嫲嫲十姑娘何婉琪逝世，她也是事後才知道，並指感到遺憾的是：「不能在她生前親自告訴她，我港大法律系畢業同取得港大PCLL（法學專業）證書。」

----------------------------

東網巨星開咗ig喇，大家快啲follow啦！

https://bit.ly/2JjSVcr