湯盈盈攞十大武器之首扑「放負最強生物」

喺一間辦公室裏面，每個同事都有唔同性格，但講到最唔討好嘅一定係「放負最強生物」，呢種生物樣樣事都覺得人哋針對佢，佢懷才不遇、狂躁抑鬱、妒忌失調！See See TVB專頁呢日就上載一條剪輯過嘅《愛回家之開心速遞》片段，講述戲中嘅繆家慶就係呢種人，大家不妨睇吓佢嘅放負事件簿！

事件一：當有同事叫佢快手少少整好份合約交畀個客嘅時候，佢就一副厭世樣話：「我又唔係senior，係咁上下。」又呻自己如果唔係畀人嫌棄，點會咁多年都冇得升職。

事件二：一班同事去餐廳食lunch，佢同其中一個同事都係叫薯仔牛腩飯，然後佢又好不滿咁對餐廳職員話：「點解佢兜飯牛腩多過薯仔，我嗰兜就薯仔多過牛腩？我明明嗌咗杯凍檸水少冰，你睇吓，同Mary姐嗰杯一樣咁多冰！你哋點做生意㗎？」

事件三：當大家夾番錢食飯時，有同事話每人62蚊，叫繆家慶畀60蚊就得，佢即刻好憤怒話：「點解要收我60蚊呀？點解要收少我兩蚊？係咪覺得我人工低？可憐我呀？」呢個時候呂慧儀都頂佢唔順，反晒白眼叫佢攞病假，話佢患有懷才不遇、狂躁抑鬱、妒忌失調症，簡稱「「黐總掣」！

事件四：由於繆家慶「病情」唔淺，作為上司嘅湯盈盈單獨約佢食飯，嘗試打開佢心窗，兩人喺大牌檔見面，盈盈叫繆家慶唔好當佢上司咁傾偈，點知佢又話：「唔當你上司我返屋企打機好過啦，使鬼出嚟畀你捽咩！」盈盈忍住度氣話下年寫好佢份年終評估，點知佢又喺度呢樣不滿嗰樣又唔鍾意，搞到盈盈忍無可忍掟爛個水杯，再攞十大武器之首－摺櫈狂毆佢，大快人心！

網民有話兒：

Lxk Mxn Wxn：正，果然神劇

Pxx Gu Chxxxg ：有個衰過佢

Wixxk Lxx：呢種人真係唔好同佢客氣

Lexxx CC：樣樣野（嘢）都唔滿意，呢種人真係超討厭！