A Whole New World～《阿拉丁》預告首曝光

迪士尼近年不斷將家喻戶曉嘅動畫拍成真人版電影，繼《美女與野獸》（Beauty and the Beast）大收特收，日前就輪到同樣經典嘅《阿拉丁》（Aladdin）真人版電影發布首個預告片段，雖然未有冧盡全球嘅洗腦名曲《A Whole New World》，但亦堅有「阿拉丁」現真身，仲好似有「賈方」嘅神秘身影！

電影由英國名導佳烈治（Guy Ritchie）執導，仲有型佬韋史密夫（Will Smith）坐陣演燈神「Genie」，主角「阿拉丁」與「茉莉公主」用上新人男星Mena Massoud與英印混血女星Naomi Scott出演。

首個預告就有疑似原著故事背景嘅阿格拉巴王國（Agrabah）遠景，仲有「阿拉丁」走入魔法洞穴，洞穴中嘅寶藏與住著燈神嘅神燈都先後出現，最搶眼一幕就係Mena出演嘅「阿拉丁」雙手慢慢接近神燈，佢嘅造型同樣首度曝光，成為動畫粉絲焦點！雖然預告片畫面比較暗，不過有網民將「阿拉丁」行入洞穴一幕較番光少少，就好似見到多一個角色，就係「賈方」Marwan Kenzari嘅身影，真係好似一個佢拎住枝杖嘅影子，但就未見到個樣，似乎要同「燈神」、「茉莉公主」同「魔氈」等，去到長版預告再見。

此外，韋史密夫日前就於社交網率先開心Share《阿拉丁》電影海報，雖然神燈，但都已經令唔少粉絲留言表示期待！