接展鵬棒　邊位小生最快跑出做「老襯」？

視帝陳展鵬與單文柔拉埋天窗，其實無綫仲有多位小生同女友發展穩定，隨時接力做「老襯」，究竟邊位跑出嘅可能性最高？

蕭正楠黃翠如　跑出指數：五粒星

兩人2014年因拍攝《師奶madam》撻着，拍拖四年多次傳出秘婚消息，二人表面否認，但可能已經結咗婚都冇人知！另外，雖然曾經有指蕭正楠介意被話係「百億女婿」，所以想事業有成先再成家立室，不過近年佢劇接劇做男一又頻頻做綜藝主持，儲落唔少老婆本，加上早前曾直認有結婚計劃，相信跑出機會最高！

馬國明黃心穎　跑出指數：四粒星

心穎被指喺2015年拍攝《為食神探》期間，成功「女追男」俘虜同劇拍檔馬國明，不過緋聞傳出多時，去到2017年尾男方先默認戀情。但近期佢哋愈愛愈高調，上月馬國明帶女友為兄弟鄭嘉穎慶祝生日，心穎獲一眾圈中好友嗌「阿嫂」，加上早前女方大爆已經見晒家長，雙方親朋好友都亮晒綠燈，隨時ready結婚！

袁偉豪張寶兒　跑出指數： 三粒星

2017年去非洲拍攝節目《打工捱世界II》朝夕相對火速成為情侶，二人隨即大方公開戀情，拍拖後男方多次為撐女友同網友駁火。早前袁爸爸病逝時，寶兒亦以素服列席家屬位。近日佢哋仲同袁媽媽一齊去日本旅行，似乎已經入晒屋。不過上月袁偉豪受訪時表示想搏多一兩年先結婚，睇怕「正式封盤」仲要等多一排。