廖安麗大女結婚 老公蝦碌賴低老婆勁搞笑

2018年10月13日 16:38
東網電視
更多新聞短片
真係恭喜晒!

藝人廖安麗(Annie)大女葉懿德(Adorna)同男友James今日喺澳洲墨爾本結婚,大批親朋好友包括媽媽、爸爸葉青霖(法號「釋常霖」)及賈思樂等到當地祝賀一對新人。唔少朋友仲喺婚禮現場拍攝短片,並甫上社交網分享呢份喜悅。

片中見一對新人先喺一個小教堂進行證婚儀式,Adorna着上簡單cutting嘅婚紗,姊妹裙及場地裝飾等就以粉紫色為主。新人進行儀式時全程面帶笑容,步出教堂時Adorna仲興奮到攬向在旁嘅好友,場面非常溫馨。而着上紅色長裙嘅Annie亦非常開心,唔單止企起身拍爛手掌,之後仲同一眾親友喺教堂外合照留念添!

證婚儀式完咗後緊接舉行婚宴,佢哋以同一套禮服出場,反而Annie就換上一條金色裙亮相,非常隆重。至於一對新人進場時表現輕鬆,佢哋先一齊大跳熱舞,之後再慢慢行近賓客,不過期間發生咗啲小意外,Adorna條婚紗裙意外被勾到,而James冇留意賴低咗老婆繼續行,但當佢發現老婆大落後時立即追返過去,拖返實佢,搞笑得嚟認真sweet到爆!