一家六口溫馨散步　張頴康囡囡變大家姐

藝人張頴康同老婆麥雅緻（Angie）有一對可愛仔女「小豆」同「小花生」，仲有兩隻狗狗Bell Bell同Master，張頴康喺facebook上載家庭樂相，一家六口齊齊去散步，見佢用孭帶孭住囝囝，而Angie就喺後面照顧住囡囡，相當溫馨！

佢仲讚小豆真係大個女，能夠自己一個拖住兩隻狗，做咗家姐果然唔同啲：「小豆全程一個拖哂兩隻，大個女真係唔同啲！」佢又笑指囝囝見到狗狗行樓梯就係咁傻笑：「小花生一見到啲狗仔行樓梯就不停傻笑，真係唔知佢笑乜！」