榮恩爆曾想劈炮!《哈利波特》險拍唔成7集

20181014
東網電視
更多新聞短片
榮恩近日自爆早年曾想劈炮唔拍《哈利波特》系列!
《哈利波特》(Harry Potter)電影系列陪住唔少人成長,好多「麻瓜」同「哈利仔」丹尼爾烈格夫(Daniel Radcliffe)、「榮恩」路拔格連(Rupert Grint)及「妙麗」愛瑪沃森(Emma Watson)一齊成長,追足7集!不過原來呢個回憶爭少少就玩完,事關路拔近日自爆,拍完第四集《哈利波特-火盃的考驗》(Harry Potter and The Goblet Of Fire)時,一度想劈炮唔撈,好彩最後無咋!
現年30歲嘅路拔自爆當時因成名而大感生活截然不同,受名氣所累:「我(當時)剛完成中等教育普通證書(GCSEs),我就諗:『我係咪真係想繼續做呢樣嘢(拍《哈利波特》片系列)?』其實係有啲拖累,因為好明顯就有犧牲,(本身)就係理所當然嘅,做平常嘅事,只係出吓街,一切都唔同晒,有啲恐怖,好多時我都覺得受夠(唔想再拍)。」
他於訪問中亦表示唔太記得拍《哈利波特》片系列前嘅生活,反而接受成名後嘅「正常生活」,但仍然覺得成為狗仔隊搵醜聞嘅目標好有壓力,並大呻周街被人影相嘅感覺好似好唔人道咁。路拔另外亦透露細個無打算入行,所以成名後亦曾對事業有懷疑:「我就感覺好似錯過咗好多咁。」
其實愛瑪都曾講過早年不滿拍攝日程太緊密,生活似被控制一樣,亦唔肯定想唔想被定型係「老土書呆子」,更表示當她最終同意再簽約五年時,曾感覺「痛苦」。