唔滿意女友？袁偉豪爆張寶兒花名叫張補妝

藝人袁偉豪（Ben）及組合Super Girls成員Jessica到九龍灣出席品牌活動，Ben即場為Jessica補妝，獲讚溫柔細心。問到跟女友張寶兒有否研究化妝問題？Ben表示大家有自己一套，由對方發揮：「我哋互不相干，當然都有畀意見。（有冇彈過佢而激嬲佢？）成日㗎啦！唔係彈，係直接，睇佢點吸收囉！（點氹番佢？）唔使氹，都係講事實！例如會叫佢唔使成日補妝，佢喺朋友界當中有個花名叫做「張補妝」！（你鍾意佢咩妝？）其實淡妝都ok，見我唔使咁濃。（佢素顏都好得？）都好得㗎！不過我多數瞓咗覺，睇唔到。（有冇試過瞓醒畀佢素顏嚇親？）唔會！咁都嚇親就退咗貨啦！佢素顏ok嘅！」

講到台慶頒獎禮將至，Ben表示會力撐《三個女人一個因》的拍檔黃智雯（Mandy）奪視后，他說：「因為套劇都好多個月之前，之後有好多套劇，怕大家唔記得，其實Mandy演繹得好好，又成熟，如果佢拎唔到視后，我就繼續幫TVB打工！希望評審同觀眾有眼光揀佢！」

講到前輩岳華逝世，Ben表示兩人沒有合作過，但多年前曾在化妝間傾偈談網球經，覺得對方是一位健康的人，而年頭亦在加拿大一起做Show，當時對方仍然很精神 ：「今朝聽到呢個消息好可惜，我明白同病痛戰鬥好辛苦，希望佢家人盡快走出傷痛。」