背王子半裸演出 鄧麗欣爆男友反應

20181023
東網電視
更多新聞短片
Stephy喺電影裏面有半裸鏡頭,但就冇預先同男友報備喎!
藝人鄧麗欣(Stephy)出席演出電影《八步半喜怒哀樂》的首映禮,講到她於戲內單元《哀:凶宅》中有半裸演出鏡頭,Stephy大爆原來是臨時加演,全因為導演泰迪羅賓覺得自己背脊好靚:「當時係冇考慮就應承咗,因為相信導演,又覺得配合到當時嘅恐怖氣氛。(拍嘅時候有清場?)都有。(係咪你嘅底線?)暫時嚟講都係,拍出嚟我覺得係靚嘅。」
互相尊重
問到男友邱勝翊(王子)是否知道有呢一幕?她笑言對方睇到劇照先知:「拍嗰時都未拍拖,相信今次都係佢嘅底線。(佢睇到有咩反應?)冇乜反應,其實冇反應先係好反應,起碼唔會反對!我覺得呢幕都合理、唔性感嘅,平時我都有着露背衫。」問下次再有裸露戲份會先向王子申請?Stephy表示唔會刻意問:「會互相尊重,都會講大概嘅內容,大家做呢行應該都明白,唔會交代得咁清楚。」問如果對方拍親熱戲會呷醋?她笑言唔會限制男友,因為自己亦唔想被限制:「做演員都明白,我可能會選擇唔睇嗰個作品。」
覺得依家結婚太快
講到日前好姊妹吳雨霏(Kary)出活動時,笑指二人是「連體嬰」分唔開,「躺着也中槍」的Stephy出擊指:「好姊妹用嚟做咩?就係出賣朋友喇!邊有啫?嗰次咁啱一齊上去探佢,佢依家就同個B分唔開!(佢話催你哋快啲結婚生B喎?)佢最叻催我呢樣、催我嗰樣!依家結婚太快,拍吓拖先!」至於另一好姊妹楊愛瑾(Miki)於IG宣布佗第二胎,Stephy就自爆較早前已經知道,覺得對方好幸福,當記者催促她要加快「步伐」時,她招架不住許下承諾:「等Miki生第三胎先!」