就嚟結婚　歐陽巧瑩放閃冧師傑：好在有你

藝人歐陽巧瑩同男友林師傑喺下月22號就會拉埋天窗，仲有差唔多一個月時間，相信佢哋心情都會愈嚟愈緊張。巧瑩呢日就喺社交網分享一張同男友嘅合照，相中見到兩個仲戴埋情侶帽同眼鏡，認真恩愛到暈，之後佢哋又齊齊擺出唔同趣怪甫士，又伸脷、擘大口、笑得燦爛，似乎兩個心情都好好，巧瑩就話：「倒數30日，籌備過程好在有你！多謝您！」好多網民都話兩個又大放閃光彈，真係好戥佢哋開心，仲話簡單平淡就係幸福呀！