廿幾年前爛尾樓！朱咪咪轉手賺30萬馬幣

藝人阮兆祥（祥仔）、朱咪咪、林建煇醫生今日為慈善演唱會到九龍灣練歌，綵排期間眾人為明日（26日）64歲生日的朱咪咪送上壽包、叉燒包賀壽，氹得朱咪咪非常開心，她笑言：「佢哋知我鍾意食叉燒包！」問到朱咪咪明日生日如何慶祝？她表示會約齊死黨打牌，唔會大搞：「我幫個仔搞結婚已經好辛苦！」她續開心透露有望可收回20多年前買落兩個單位的「爛尾樓」，若成功收回，每個單位轉手賣出可賺30幾萬馬幣：「啱啱先開完會，個手續都唔知要再搞幾耐。（買畀仔仔？）依家所有物業梗係Under自己名啦！但其實我依家都有立平安紙。」

其後又講到最近兩年生日都打破「規則」：「往年嘅新年、生日我都係唔做嘢，但上年就去咗墨爾本做華裔小姐嘉賓，人哋未宣布5強就飛走咗，嚟緊新年我又去雲頂登台，本身之後直飛多倫多，但取消咗，再去就對唔住個仔。」

自爆等錢使

祥仔聞言笑問朱咪咪：「點解要周圍登台咁Chur？」朱咪咪爆笑話因為等錢使，但即被祥仔大爆她於新加坡是大地主，最近更「進化」到買地，朱咪咪自言：「我唔驚李顯龍（新加坡總理）嚟搵我。」祥仔再出擊：「李顯龍唔搵你啫，我驚范冰冰嚟搵你！」朱咪咪落閘話：「我好循規蹈矩！」認真爆笑！