冇得洞房！苟芸慧婚後做嘅第一件事係.....

新婚的苟芸慧出席面膜品牌活動，是婚後首度出席活動，穿上粉紅套裝的她紅粉緋緋，又獲贈花球。受訪時她笑言婚禮後有蝦碌事：「我哋去咗執垃圾，會場話我哋仲有啲手尾未執好，所以我哋就落去執番啲箱、盒仔，搞笑嘅係我嗰陣敷緊面膜，又着住套睡衣，但個新娘頭仲喺度，結果執到凌晨4點。」

她亦謂老公陸漢洋有落手落腳執埋一份，覺得幾浪漫和窩心：「平時佢係少爺仔，好少做呢啲，我哋執完之後好攰，返到房即刻瞓着。」豈不是浪費洞房機會？她說：「冇呀，因為太攰，朝早太早起身。」

互叫豬豬

問到成為陸太的感受，她表示：「ok嘅。（有冇煮嘢畀佢食？）冇呀，不過有沖茶畀佢飲。」問到慣叫對方做老公未？她冧笑謂：「未改口，不過佢好sweet，我哋幾日後搞咗個after party，佢都有幫手照顧我啲朋友。（佢值幾多分？）101分！」問到平時點叫老公？她繼續冧笑謂：「我叫佢豬豬。（咁佢點叫你？）都係叫我豬豬。（咁咪撞名？）唔怕，我哋知道叫緊邊個。」而問到可會度蜜月？她表示不會，上次影婚紗照當去了。問到之後可是復工？她表示：「係呀，之後會拍劇，同埋出兩個event，但會留喺香港嘅，可以陪多啲佢。（盡量揀喺香港嘅工作嚟做？）主要喺香港，不過佢遲啲都可能會去第二度比賽。」問到造人大計，是否想生夠4個？她說：「佢未ready，想二人世界先，我ok嘅。」

另外，講到有指陸漢洋給她一千萬家用，她表示：「係咩？點解我唔知嘅？等我check下先。（唔止呢個數？）冇，笑下算。（佢會唔會畀家用你？）平時佢都會畀卡我買嘢，不過其實我都會賺錢嚟投資，我係獨立女性。」