見證黃秋生被打爆缸！鄧萃雯做埋心理輔導

藝人鄧萃雯出席活動，講到好友黃秋生日前喪母，雯女表示秋生有WhatsApp給她，知對方很傷心，亦有為他祈禱。講到秋生早前受訪時透露雯女見證他被私生子生母打到流血一事，對此她表示當時有嚇親：「當時唔係好熟，識咗唔係好耐，係新朋友，突然見到佢爆缸都嚇親，但因為呢件事之後都同佢熟咗，因為佢平時係大男人嚟，但都畀我睇到佢唔掂、軟弱嘅一面，當時我做番基督徒冇耐，所以助人嘅使命感特別強，當時我叫自己做鄧姑娘，就叫佢做黃小朋友，佢需要求助時就可以搵我，呢個花名係我哋之間嘅一個秘密。」

提到佘詩曼（阿佘）最近接受節目訪問，重提當年台慶頒獎禮被對手白眼一事，有指該對手是雯女，聞言她即愕然笑言：「吓？我散光喎，有冇人白眼我都唔知啦，如果第時出街啲人見到我唔打招呼唔好介意。」談到兩人的關係，她表示兩人是中學的學姊學妹：「雖然我哋依家工作冇接觸，但我哋校友會接觸，之前佢都有問我返唔返去探舊老師。（感情好好？ ）唔算好好，但係學姊學妹，會分享學校嘅嘢。」問到可會問阿佘究竟指誰人？她笑言：「梗係唔會啦，呢啲八卦嘢，呢啲茶餘飯後嘅嘢冇記啦，我覺得阿佘係一定唔會記得呢啲嘢嘅人。」

談到現時為ViuTV劇集《婚內情》拍攝，笑言不慣拍劇有假放：「我之前催人攞通告，但佢話有幾日唔使開，所以好舒服，之前拍電視劇中間唔會停㗎嘛，依家就好似新丁咁，同埋反而冇拍我同陳錦鴻嘅夫妻戲先，係拍咗發生好多事嘅戲先，難度好高，同埋今次好多都係新對手，但好玩嘅，有新鮮感。」