缺水谷肌拍劇　黎耀祥：入行30年第一次

最近忙於拍攝新劇《殺手》的視帝黎耀祥（祥仔），今日以代言人身份出席韓國保健食品《正官庄形象新店開幕典禮》，身材Fit到爆的祥仔，「暗藏」腹肌兼胸肌！受訪時笑言要為該劇減肥，形容今次拍攝是執行最後一次死亡任務：「初頭係要落泊啲，到最尾發奮圖強要操Fit！戲入面有啲場口係要除衫，呢個都算係我人生入面嘅一個大任務，因為都未試過要求有腹肌、胸肌咁除衫，入行30幾年第一次。」

陳豪秘傳操肌要訣

已經54歲的祥仔指好友陳豪有「教路」，其中一個秘訣是拍攝前兩日唔飲水：「等個身冇水收乾，咁啲肌肉先至會出嚟，但原來真係好辛苦！佢都仲有講啲健康瘦身方法畀我聽。」問現時膝頭傷勢如何？他表示有去做針灸，因為《殺》劇有大量打鬥場面，熱身唔夠就好易「出事」：「呢部戲係我入行以嚟嘅紀念作，最多打戲，又要除衫騷肌。（有冇影相留念？）有呀！監製話之後等劇集出街先發相做宣傳。」並強調再接打戲都一定諗清楚先：「冇下次㗎喇！真係最後一次，老實講年紀都唔細，過幾年仲要繼續咁樣操，都承受唔到。」

操肌感染阿仔減肥

問可有感染阿仔愛上操肌？祥仔坦言有：「佢見我過咗5字都仲咁有恒心做呢樣嘢，拍完場戲Send相畀佢睇，佢都覺得好感動，所以佢都應承我要減肥，一齊Keep有人做伴會容易啲！」問黎耀祥太太可會鍾意老公呢副「偈」？祥仔得戚搶答太太愛不釋手！又自言可進軍韓國市場，因為當地愛大隻大叔，認真爆笑！

----------------------------

東網巨星開咗ig喇，大家快啲follow啦！

https://bit.ly/2JjSVcr