唔知有咩對手?袁偉豪對視帝提名有疑惑

20181027
東網電視
更多新聞短片
袁偉豪話要幫黃智雯拉票!
藝人袁偉豪(Ben)前往新加坡及馬來西亞為台慶頒獎禮拉票,問到獲獎信心時?他坦言一般:「對手勁,而且我都好耐冇見當地觀眾。我今次去當地反而係想幫《三個女人一個「因」 》嘅拍檔黃智雯拉票。(睇好佢攞視后?)一定要支持佢,佢拍得咁辛苦。其實我有啲奇怪我係《三》冇份提名視帝,而係《棟仁的時光》提名,我覺得自己兩套劇都可以被提名,因為係兩個演出都唔同,《三》個色彩多啲、搞笑同幽默啲又辛苦啲,但就以女性為主導啲,《棟》就淡然啲,睇吓觀眾鍾意咩劇種,不過只要觀眾鍾意我,我邊套劇提名佢哋都會支持。(睇好自己攞獎?)有份角逐都希望有收獲,邊度嘅獎都一樣,三個地方即係有三分一機會攞。其實我好平常心,唔係睇得太重,唔係唔想攞,我對獎好順其自然,而且要睇對手同邊套劇今年有迴響,唔係有劇出就一定有獎攞。(邊個係最大對手?)我今年冇乜點睇劇,要溫故吓,但我有留意譚俊彥嘅《天命》。」
另外,以往在馬來西亞舉行的《TVB馬來西亞星光薈萃頒獎禮》及新加坡舉行的《星和無綫電視大獎》今年將取消,改為在無綫台慶當日頒發,Ben認為對藝人來說只是少了兩個出埠機會而已:「不過我哋都要去拉票同宣傳,只係製作上另一個安排,喺香港頒晒所有獎,節省多啲travel時間,公司有自己安排。」