視后戰！李佳芯嗌埋男友啲Frd幫手投票

藝人李佳芯（Ali）今日起程到台灣拍劇集《殺手》的外景，她稱在當地會有追逐戲及尋人戲，並笑言：「我喺台灣都會繼續畀人打，由香港畀人打到去台灣，同劇要打人嘅演員成日受傷，我都畀人打到啲關節位損晒同瘀晒。」

由於Ali要在外地拍劇，故未能到星馬為頒獎禮拉票，問到會否感蝕底？她說：「係呀！蝕晒，啲觀眾會唔記得我，黎諾懿有份去，佢話會幫我拉票，睇吓佢成唔成功。（你上年攞過新加坡視后。）係咪上年攞過就好難再攞，我今年又冇得去拉票。（有冇信心再攞？）冇信心，通常冧莊係好難，冧莊仲難過第一次攞。（攞香港視后？）今年要更上一層樓，希望啦！跟住就買樓上車。（結婚先？）唔會啦！（你喺香港會點拉票？）我都唔知，街頭賣藝有冇用？我可以唱歌，不過都係唔好，會嚇親人。（派福利？）即係着泳衣嗰啲？唔好，如果係咁，我上年攞獎咪已經欠咗大家一次。（叫男友陳炳銓拉票？）有冇用呢？佢啲朋友有冇投票權？如果有用就會叫佢拉票，冇用就唔好。（男友嚟台灣探班？）緊係唔會啦！（好難得有私人空間？）我平時好忙，大家已經好多空間喇！（可能佢覺得唔夠？）係我需要抖吓氣。我係指我要去台灣呼吸新鮮空氣啫！」