「香港仔」司徒頌曦大爆勇闖荷里活血淚史

一部以亞洲人揹飛的《我的超豪男友》（Crazy Rich Asians）早前在北美上映時票房大賣，令亞洲電影人再度在荷里活惹起關注！最近荷里活就出現一名三十歲出頭的香港男演員，成功打入荷里活，成為影壇冒起新星。佢就係來自藝術世家的司徒頌曦（Hayden Szeto）!

唔忿氣誓要在美國做演員

現年33歲的Hayden在加拿大土生土長早前回港探家人，留港期間他接受東網專訪講述勇闖荷里活的血淚史！他說：「其實我準備執行李搬去洛杉磯決定要做演員嗰陣，我好驚！因為嗰邊冇幾多機會畀亞洲演員，尤其重要係亞洲男性方面。因為以往荷里活片會以老外為主，亞洲女性通常都被安排成為老外女友、奴隸，屬配襯嘅角色。而亞洲男人仲衰，完全唔當係人被當正係狗，成日要演被人取笑嘅角色。初時我好嬲，但我同自己講嬲係冇用，要自己出去闖才可以改變，要與其他人背道而馳，如果唔係，咩都改變唔到！當年李小龍就係咁。」而《我》出現之後，情況似乎有所改變。亞洲演員多咗演出機會。近期Hayden主演的新片《Tigertail》幕前幕後都係由亞洲人擔任。他說：「依家喺美國做亞洲演員係最好嘅時候！我喺呢個時候置身其中，真係好幸福！」

追夢6年終被賞識

在荷里活捱足6年後終於捱出頭，Hayden憑2016年一部低成本的校園片《17歲的邊緣》（The Edge of Seventeen）走紅，就連電影公司都在電影雜誌落全版拉票廣告推薦他獲奧斯卡最佳男配角的提名。Hayden憶述當時見到個廣告時感動到喊，足足喊咗成半個鐘！他說：「我當時追了呢個夢想（成為荷里活演員）追咗6年，每年申請續美國簽證時都要畀新成績移民局睇，例如拍咗幾多個廣告或拍咗幾多部戲。之前3年完全冇做出咩嘢成績，當時心諗要返屋企（加拿大），差唔多要執行李疊埋心水返屋企之時，我經理人打電話畀我叫我去霍士（Fox）試鏡。經過兩次試鏡後終於成功。結果有電影網站報道呢件事，因而我獲批綠卡。拍戲拍到今時今日！」