楊澤怡唱電影主題曲似校歌

前FFx成員楊澤怡（Shirley）出席電影《毛俠》的慈善謝票場，該戲以保護動物為主題，她表示家中也養有兩隻小狗，認為狗是人類的好朋友，她經常在泰國居住，當地有很多流浪貓狗，她也會不時餵飼牠們。談到工作，她透露最近拍畢電影，會獻唱主題曲：「我喺套戲係飾演大學生，首歌好似校歌咁，個MV紀錄我入行呢六年嘅經歷，所以好期待。而我會再推出另一首新歌，會走中國風路線，對我嚟講係挑戰，成首歌會用中樂，個MV想拍到好似古裝劇咁。」

另外，《毛》片導演區焯文稱已參與了二十多場謝票，由每場最初十多名觀眾至後來全院滿座：「我哋花咗48萬去拍攝，係小本製作關於社會議題嘅電影，由社區播放變成院線電影，都算係個奇迹，除咗有好口碑外，連戲中嘅流浪狗都成功被領養。如果下次再拍狗仔題材，我會想探討國際性議題，例如狗肉節之類。」