甫張相都唔安樂　工藤佑采再度發功暗寸無綫

落選港姐工藤佑采一向敢言，但就因為出位言論辣着唔少火頭，呢日佢喺社交網晒出近照，本來只係放新相都冇咩問題，但佢留言回應網友留言時，又再衰多口玩暗寸，引起網友熱議。佢上載咗一張浸泡泡浴嘅相，並留言：「運動後 浸一個泡泡浴」，但相中只見佢影住裝滿泡泡嘅手掌，令網友表示想睇到佢「現真身」，仲話「又唔直播埋泡泡浴情況」、「等我地班觀眾眼睛吃冰淇淋」。

工藤佑采睇見之後即刻回應，字裏行間仲疑似暗寸無綫節目《3日2夜》：「你當依家睇TTC 三日兩夜？」有網友再度翻炒佢早前同黃心穎隔空罵戰，以及為撐馮盈盈而暗寸莊思明等等嘅是非，建議佢同一眾「對頭人」一齊搞個「帶著矛盾去浸浴」嘅節目，仲話一定好有話題性喎！