滕麗名請假演舞台劇　拍檔呂慧儀冇投訴

藝人滕麗名、呂慧儀、單立文、湯盈盈及李偉健等，下午到深水埗出席《愛·回家之開心速遞》萬聖節宣傳活動。一眾演員玩遊戲時相當投入，互攬兼瞓地，感情相當融洽。

受訪時，滕麗名與呂慧儀表示要在工作中度過萬聖節。呂慧儀談到四歲囝囝即打趣謂：「佢暫時唔係好識，最緊張係聖誕節砌聖誕樹啫！我做少一樣得一樣啦。（聖誕節你會否同佢去旅行補數？）我係好想去旅行就真，但係單立文請咗假同老婆慶祝生日，阿滕要忙演出舞台劇，所以我要留守喺劇組，不過冇所謂，我預咗成家人到時會去捧阿滕場。」她又笑言囝囝陪自己開工已好開心：「到時帶佢返吓工囉！況且拍檔們好照顧佢，我有好多baby sitters（保姆）。」

阿滕則搞笑指預計未來日子會受盡白眼：「梗係啦！我請假投入舞台劇演出及綵排，不過都想盡量朝早拍吓劇先。（咁忙？）我鍾意嘅，老公自己搞掂啦！（請劇組食嘢補數？）呢樣預咗唔少得。」她又指自己習慣聖誕節去旅行，今年就要擱置旅行計劃：「《愛回家》仲有排拍，唔知幾時先有得去喇！」