嫌霆鋒太Dry　陳奕迅自爆鍾意濕啲…

歌手陳奕迅（Eason）今晚聯同The Duo Band於中環開騷，Eason表示很開心在1997年收到林建華及林夕寫給他的《與我常在》，隨即唱出《與你常在》和《與我常在》，又拿起手機自拍和影The Duo Band成員，然後表示唱多一首歌就完騷：「係呀，好快，不過好好玩、好豐富。」他表示心願是做跨年騷，笑言希望謝霆鋒不會和他爭期：「我係歌手嘛，佢都係，不過佢偏向煮嘢，冇我咁大壓力。講到好似申請咗咁，不過講吓唔使死！謝霆鋒幾靚仔，不過乾啲，我就濕啲（成頭汗），我鍾意濕啲、潤啲嘛！」

特別多謝盧凱彤

他向同事、觀眾及The Duo Band致謝，更特別多謝早前墜樓身亡、本是The Duo Band成員之一的盧凱彤（Ellen）：「你哋有冇Feel到？好多聲佢都一早彈定，唔好睇唔到就以為佢冇彈，其實每首歌都有，多謝！She's always with us！」他更多謝「核心外圍」的粉絲，強調沒忘記他們，又向場外大叫：「星期六去邊？去隔離wine & dine？大家一陣守規矩走，不過唔好太禮讓，咁會走唔到！」觀眾大表不捨，他就搞Gag說：「天下無不散之林夕（筵席），祝大家生活愉快！」後再與The Duo Band合唱《可一可再》。之後台上各人與觀眾大合照，有成員更手持有Ellen在內的The Duo Band舊合照。

出場Encore

完騷後觀眾不斷大叫Encore，眾人再次現身，Eason說：「一定唔會由頭唱多次，雖然我唔介意，不過無謂啦。通常興奮完就好想要，好似想食兩碗飯咁，不過食到一碗半就覺得早知食一碗就算，食多個雪糕就啱啱好，依家送雪糕畀你哋，冇理由唔唱呢首。」他唱出萬眾期待的《幸福摩天輪》，又帶領觀眾揮手。最後他以飛吻答謝大家及The Duo Band，演唱會及網上直播圓滿結束。