《全民造星》出動　姜濤獻唱冧死人

ViuTV選秀節目《Good Night Show全民造星》大受歡迎，節目中一眾小鮮肉人氣急升，其中比賽最後三甲姜濤、陳卓賢（Ian）、楊樂文（Lokman），人氣選手Anson Lo以及一班學員齊齊現身中環為活動擔任表演嘉賓，引嚟大批觀眾欣賞佢哋嘅精彩演出。佢哋先一齊又跳又唱，之後再分別由三甲及Anson輪流進行Solo表演，而姜濤更再次獻唱節目中hit爆歌曲《我多喜歡你，你會知道》，炒熱全場氣氛。

表演完之後，佢哋非常親民向台下粉絲打招呼，返到後台準備離開時，佢哋一行人主動行向粉絲，姜濤唔單止拍低一眾粉絲圍觀嘅情況，更為其他選手拍照留念，並不停向粉絲講多謝兼收禮物，全程nice到爆。

另外，近日有傳全民造星將會喺12月舉行演唱會，不過一眾選手暫時一概「封口」未有透露詳情。