決定唔生B　卓韻芝列兩大原因

於今年9月新婚的藝人卓韻芝（阿芝）假旺角麥花臣場館舉行一連兩場婚後首個棟篤笑，首場獲婆婆、老公「閃電俠」梁子賢、好友林一峰、周勵淇（Niki）、彭浩翔等現身支持，現場爆滿相當墟冚！身穿Sharp醒橙色一字膊上衣配短皮褲的阿芝，於播放結婚進行曲之下拎住花球出場，邊行更邊風騷大晒婚戒，引來全場觀眾歡呼兼拍手歡迎，她開心話：「多謝你哋！我結咗婚個幾月啦！你問我開唔開心？梗緊開心啦！你哋唔好遲一年先問我？」再次令全場爆笑！

之後阿芝笑話出場前都有循例問老公自己靚唔靚：「佢話好靚，但其實佢次次都係咁答，都唔知我真係靚定係真係咁惡！」然後阿芝向台下一眾好友打招呼，一見到Niki時，阿芝語帶有刺、抵死笑話：「多謝你遲咗成個幾月嚟我嘅婚禮！」

阿芝講到婚後身邊有好多朋友都問自己會唔會生B、幾時生B、有冇計劃生B？她坦言唔敢，因為有幾個原因：「第一，生B之後要供書教學，接放學一同你講普通話真係想同佢講『粗你媽』！你阿媽我嘅母語係廣東話，我唔係歧視你講普通話，我係怕你尊卑不分！」台下觀眾對「母語論」拍爛手掌，阿芝繼續邊講邊扮嬲，更作狀一巴掌摑細路：「我唔生係因為驚我會坐監！我哋嘅下一代係講流利嘅普通話同英文，有見過小朋友同佢爸爸、媽媽講英文，佢父母聽唔明搞到佢唔耐煩。」

再講到另一個唔生的原因，阿芝就話身邊朋友一生完就好似「死咗」：「叫佢哋出嚟飲嘢，佢哋都話要湊B唔嚟，湊B湊到窒息，（湊B）就好似一份工，但呢份工係唔可以辭職，係一世冇得放工。」接着阿芝拎住一個公仔扮B，落台叫觀眾「認領」作近距離接觸。