掂污水過敏　陳瀅頸後現紅粒嗌痕

藝人陳瀅（Jeannie）、劉佩玥（Moon）、馬德鐘、何廣沛、謝雪心等一眾《跳躍生命線》演員到荃灣出席慈善步行活動，Jeannie頸後驚現紅粒，她透露因日前為劇集《廉政行動2019》拍攝一場落水戲：「啲水幾污糟，因為都近船同碼頭，水面見到油漬、膠樽同垃圾，搞到皮膚敏感，夜晚瞓醒覺得好痕，起身就去睇醫生，自己去咗醫院睇，醫生話要食清淡啲。」Jeannie指幸好拍了一個Take便完成，沒有在水中待太久：「好彩都係背，面就冇事。（去唔到滑水？）唔滑住喇，雖然去滑水唔近岸，水都乾淨啲，但驚咗。」

Jeannie指平日與Moon行山亦會被蚊蟲叮咬而紅腫，Moon則表示得知好姊妹皮膚出問題，亦有向她八卦關心一吓：「拉開佢件衫睇，好彩唔係成個背都係，加上塊面冇事，真係不幸中嘅大幸。」Moon表示首次參與慈善步行，早起特別醒神：「做善事人都靚啲，希望Jeannie可以快啲好番。」