群星萬聖節P　Channing前妻火速「覓食」

早年拍《舞出真我》（Step Up）舞出真感情而拍拖結婚的美國男星Channing Tatum與女星Jenna Dewan今年4月宣布離婚，女方近日正式入紙結束約9年婚姻，男方回應時表明拒絕支付贍養費，一代荷里活「金童玉女」離婚後似乎仍有手尾跟！隨着男方傳戀上歌手Jessie J，Jenna入紙申請離婚翌日，即被爆於萬聖節活動識到新仔，相當快手！

據悉Jenna扮成仙子與老友JoAnna Garcia出席巨星雲集的萬聖節P，知情者表示：「佢同JoAnna一齊嚟，但好快就於場內識咗個男仔！」有指二人雙手成晚都離不開對方，而且跳舞時，仲齊齊唱90年代Hip Hop歌，似乎堅打得火熱，傳Jenna望落勁開心而且心情好靚，似乎未受Channing拒絕畀贍養費影響心情！目擊者更指Jenna與新仔一相識就好似熱戀中一樣，最後不但手拖手離場：「佢哋走之前更於後園咀！Jenna完全未有收收埋埋！」不過爆料者就未有公開Jenna新仔身份，僅表示：「佢唔出名但好靚仔，好高而且係有一頭黑髮。」

影星佐治古尼（George Clooney）與老友型佬老公蘭迪（Rande Gerber）協辦派對，前者未有現身，蘭迪就與名模老婆仙蒂歌羅馥（Cindy Crawford）及一對仔女分別扮大衛寶兒（David Bowie）及以Rock友造型示人，同場仲有勁多紅星，包括「里奧仔」奧勒度狄卡比奧（Leonardo DiCaprio）、歌手Harry Styles與名媛Paris Hilton等，據悉Harry扮成艾頓莊（Elton John），成晚玩得好盡慶！