15億票房！發哥自嘲似港版阿甘：跑返嚟！

由英皇投資及出品的電影《無雙》全球票房逼近15億，今日假銅鑼灣舉行慶功宴。導演莊文強、演員周潤發、馮文娟及廖啟智等均有出席，四人接受訪問時，周潤發笑指莊導演迷戀自己：「多謝導演，佢細個嘅時候老竇係開戲院，佢睇咗我套《英雄本色》一百次，佢好迷戀我。（太太）發嫂都叫佢（莊文強）唔好行咁近，唔掂就ok。佢收埋咗個劇本十年，佢都好大膽向我表白同我講呢個劇本。」

「幾晚瞓唔着」

他又大讚同戲的郭富城演技達到九層塔，更進一層樓：「戲中我係佢嘅另一面，有佢嘅敘述，先有我嘅出現，係佢想像到我咁靚仔，其實佢靚仔過我。」對於票房達15億，發哥坦言好誇張：「開心到不得了，幾晚瞓唔着，冇諗過可以咁好，係天時地利人和。個劇本，導演放咗十年，開唔開心終於可以見天日？」莊導演笑言：「我有好多呢啲（劇本），已經發晒霉，係腐乳。（預計有幾多票房？）我唔識計，啲人話會有13億人仔。我哋套戲好怪，票房冇一日係有一億，不過日日有啲，雖然有好多新戲上，但我哋又死唔去，排第二，因為冇乜大片上。」廖啟智即時大玩押韻說：「《無雙》票房衝衝衝，觀眾支持好輕鬆。」馮文娟也表示很高興及開心獲得如此佳績。

票房係跑返嚟

至於會否再拍續集或前傳？莊導演直言：「要先搞好啲發霉嘅（劇本）。有機會原班人再拍，我哋好似戲班咁，夾慣咗。」發哥稱只擔心對方不找自己再合作，對於導演指電影有一半票房是靠他，他開玩笑說：「係咩？唔關我嘅演技同我個名事，我係跑返嚟，又跑飛鵝山、陽明山、奧運村，東跑跑西跑跑，大媽跟我跑。我由北京開始宣傳到最後返番北京，個幾月去咗十幾個地方，我做咗港版阿甘，真係甘甘甘。」問他可會休息一段時間？他笑言不會，因為發嫂逼得很急，十二月又開拍新戲，並大爆：「都係莊文強導演寫嘅劇本，但未搵導演。」

拍續集？

另外，英皇集團主席楊受成大讚有周潤發、郭富城及莊文強的組合冇得頂，問到會否原班底再拍新戲？他坦言：「睇佢哋點諗，我哋做生意，賺錢就去，蝕錢走都走唔切。」