恐怖片童星逐個數 《孤疑》童星變索女
20181030
東網電視
更多新聞短片
恐怖片童星你又認得幾多？
萬聖節又嚟喇！回顧多年嚟嘅歐美恐怖片都出現過唔少令人印象深刻嘅童星角色。而呢班 「鬼」仔「鬼」妹經已長大成人各有發展。有啲繼續喺影壇搵食，亦有啲已轉行另覓出路！
《七夜冤靈》
由「日本鬼王」中田秀夫執導嘅經典鬼片《午夜凶鈴》自98年上映後曾被「借屍還魂」被荷里活重拍過，拍成兩集《七夜冤靈》（The Ring）及《鬼迷剎瑪莉》（The Ring 2）。而喺片中飾演「鬼妹貞子」剎瑪莉（Samara）的美國女星Daveigh Chase今年已28歲。除了扮鬼之外，原來Daveigh亦曾為迪士尼動畫《扮嘢小魔星》（Lilo and Stitch）中小妹妹主角Lilo配音。不過由於佢剎瑪莉角色太令人深刻，最後都被定型再於恐怖片《死亡幻覺》（Donnie Darko）中演出過。
《凶兆》
曾經憑70年代經典恐怖片《凶兆》（The Omen）中魔鬼之子Damien一角而走紅的英國男演員Harvey Stephens，與好多童星的遭遇一樣，因名利沖昏頭而惹上官非。2016年，47歲的Harvey就因為涉嫌襲擊兩名單車駕駛者而被捕。最終他因罪成而被判緩刑兩年與罰款。
《閃靈》
經典恐怖片《閃靈》（The Shining）中的恐怖孖妹Grady姊妹花相信嚇親唔少人！飾演佢哋嘅Lisa與Louise Burns兩姊妹，今年已50歲。雖然兩姊妹拍罷《閃》之後已冇再拍戲，但二人仍活躍社交網深得fans的支持。而Grady姊妹花的造型更成為經典恐怖片形象，除了今年推出的《挑戰者1號》（Ready Player One）重玩之外，上月推出的《MAD》封面亦惡搞多一次！
《驅魔人》
在恐怖片經典《驅魔人》（The Exorcist）中飾演被邪靈入侵女童Regan的美國女星蓮達貝里雅（Linda Blair）當年憑精彩演出而勇奪金球獎最佳女配角。只可惜一早被定型，除了兩集《驅》之外，演來演去都係恐怖片。包括96年客串《奪命狂呼》（Scream）。就連近作《Landfill》都係恐怖片！
除了演戲之外，蓮達亦係愛護動物人士。曾參與過多個愛護動物及人道組織的工作。此外，2004年她亦成立動物愛心基金會，為動物謀福利。2005年，她更到受颶風卡塔里娜吹襲的密西西比拯救51隻被遺棄的狗隻。絕對愛心爆棚！
《鬼眼》
講開恐怖片童星，又點可以少得「I see dead people」的「鬼眼仔」希利祖奧士文（Haley Joel Osment）！佢憑99年《鬼眼》（The Sixth Sense）中Cole Sear一角上位，雖然多年來仍在影壇打滾，只可惜無以為繼。事業下跌，體重上升，由精靈可愛的「鬼眼仔」，變為中年發福的麻甩佬！加上屢次惹官非，曾因醉駕而被判3年緩刑之外，今年初他又因大鬧機場兼出言恐嚇航空公司職員，而搞到航空公司要報警求助。
《孤疑》
2009年在電影《孤疑》（The Orphan）中憑「不老症」變態女Esther走紅的Isabella Fuhrman今年已21歲，樣靚身材好的她雖然仍有戲拍，但紅戲唔紅人。2012年，她原本有機會擔正《飢餓遊戲》（The Hunger Games），當時她曾為女主角Katniss試鏡，但由於當時年紀太細得15歲，所以最終不獲取錄，改演另一角色Clove。而同年，有傳Isabella將主演恐怖片《陰風陣陣》（Suspiria）的新版，但後來拍攝計劃因官司問題而取消。
----------------------------
東網巨星開咗ig喇，大家快啲follow啦！