導演處女作奪獎　陳法拉：諗住玩吓咋

藝人陳法拉於金鐘出席品牌活動，活動上佢同好友楊洛婷（Rabeea）同場，即興奮表示好耐冇見，仲大讚對方做咗媽媽都keep住凍齡，場面搞笑。

提到早前導演處女作奪獎，佢表示係意料之外：「本身只係想試吓拍嚟自己玩吓，所以真係完全冇諗過，係好大嘅鼓勵。（會唔會真係拍套長片？）其實我依家寫緊個戲，係劇情片嚟，都會自已演埋，不過暫時都係籌備緊，要等寫完先知啲細節。（做埋導演？）應該唔會，導演好多嘢要兼顧，比較難投入演戲。」佢續指會係一套外語片，並笑言寫作進度可快可慢，希望可以2019年前完工，又話仲搵緊人投資，笑言可考慮申請政府資助。

至於講到演員方面嘅工作，佢就透露月尾將會去內蒙古開新戲：「會同一位新嘅女導演合作，所以自己都好期待。（會同咩演員？）都係一啲香港觀眾比較陌生嘅演員。」佢續指屆時當地天氣寒冷，可能會達零下5度，所以會準備大量暖包。