田中圭認人氣勁20倍　「大叔」拖嫩妻晒恩愛

在日劇《大叔的愛》飾演田中圭同志上司的59歲吉田鋼太郎，在戲中擁有一顆少女心，深受劇迷歡迎。現實中，吉田原來卻相當花Fit，他曾有過三段婚姻，去年與結識僅半年的女友閃婚，第4度娶妻。

有傳媒於10月中旬，拍到他與細22年的老婆高級超巿購物，公開拍拖晒幸福。吉岡十分有風度，全程負責推購物車，期間兩夫妻買了Smoothie（奶昔／沙冰）歎，仲交換來飲，又交流邊杯好飲，簡直Sweet爆。回家時，老婆十分體貼老公做「柴可夫」，讓快將60歲的吉田坐在車廂後座休息一吓。

另外，吉田與田中圭亮相昨晚電視節目受訪，吉田在預先錄映的環節中大爆拍攝時，田中圭對他有愛的表現，他拍完《大叔的愛》自己的戲份，田中圭竟然爆喊，好明顯唔捨得自己。他笑言自己都會妒忌田中圭同劇中情敵林遣都收工到餐廳「撐枱腳」。而田中圭承認《大叔的愛》播映後，人氣比以前多出20倍，又自爆最近開始留意女性的鼻，仲好想伸手指入對方的鼻哥窿。