友情背後…許靖韻IG狂「數」劉人語

歌手許靖韻（Angela）因參加內地節目《創造101》而人氣急升，早前佢現身內地音樂節目擔任表演嘉賓，仲重遇因為《創》而結緣成為好友嘅內地女歌手劉人語。難得可以再見番面，佢哋除咗把握機會短敍一番，亦不忘大玩自拍兼放到微博，相中見佢哋大擺趣怪表情，淨睇相都feel到佢哋有幾開心。

而Angela亦留言話對方一直笑佢嘅普通話，佢指：「一見面就（一直找機會）懟我的普通話，然後又說我智商跟她年齡差不多，但我不認同」，之後唔忿氣嘅Angela再轉戰Instagram反擊，以廣東話口語留言大爆料指對方廣東話極差，唱晒成段廣東歌都聽唔出唱緊咩，仲千叮萬囑粉絲唔準翻譯畀佢聽，認真搞笑！