【重返樂壇】古天樂點解肯同謝安琪合唱？

歌手麥浚龍（Juno）與謝安琪（Kay）的年度企劃，創作出董折、浦銘心兩個角色，貫穿所有歌曲及MV，概念如電影般，繼先後推出《人妻的偽術》、《勇悍·17》及《一個女人和浴室》多首單曲後，近日再有新曲，今次更邀請到藝人古天樂（古仔）飾演Kay的第二任丈夫藍定凌，與Kay合唱由Juno監製的新歌《（一個男人）一個女人和浴室》。Kay開心地說：「古仔飾演嘅藍定凌同Juno所飾演嘅董折好唔同，藍定凌係個近乎完美嘅男人，佢細心，尊重另一半，尊重愛情，遷就對方，今次以大家角色出發去唱歌，有別以往典型唱法，唔再單純只係歌者演繹一首單曲，有角色有情緒，我相信大家聽歌後會感同身受，想有個咁好嘅老公！」

自稱唔擅長唱歌

是次邀得古仔重返樂壇，並不簡單，原來古仔早前拍攝Juno執導電影《風林火山》後，互相欣賞對方，古仔說：「娛樂圈最緊要肯踏出第一步試唔同範籌，去創新唔怕蝕底先可以有新一頁。」而有《男朋友》和《今期流行》等經典歌曲的古仔笑言：「我唔擅長唱歌，但《一個男人》唔單只係首流行曲，係整個故事嘅一部分，一個回憶，我以藍定凌嘅身份去唱，係一個表演，有劇情，就如一部電影，所以我試，假如真係會拍成電影，我都會期待。」

堅拒唱Live

古仔和Kay是次合唱，錄音非常順利，兩人均大讚有趣，Kay還打趣要相約古仔一起登台，古仔聞言即耍手：「做咩都得，唔好要我唱Live，呢首歌歌詞句句唔同，冇重複，我揸起支咪已有壓力喇！」Kay笑言：「可能你之後又覺得好喜歡呢首歌，好想現場唱畀觀眾聽呢！」

----------------------------

東網巨星開咗ig喇，大家快啲follow啦！

https://bit.ly/2JjSVcr