記者好奇秀賢識英文涉種族歧視　Erza即護花

《哈利波特》（Harry Potter）系列外傳《怪獸與葛林戴華德之罪》（Fantastic Beasts: The Crimes of Grindelwald）即時上映，眾星近日密密宣傳話題作，不過有挪威記者Kjersti Flaa就鬧出是非！

事源有份參演的韓國女星秀賢於片中飾演被下咒會變身毒蛇「Nagini」的角色，呢條蛇於正傳之中仲係「Big Boss」佛地魔的寵物蛇，份量唔少，秀賢早前就與片中另一要角「Credence」Ezra Miller受訪，Kjersti問到她首次接觸系列的經過時，她自言於韓國中學時就睇系列原著，Kjersti即驚訝追問：「但你當時睇英文？咁即係你當時就講英文…」未等Kjersti問完，Ezra即時護花：「佢（秀賢）而家仍然講英文，講得好好，好不得了，我就只係識講英文，我啲韓文勁差！」串爆記者同時化解秀賢的尷尬場面！

訪問一出，不少網民批評Kjersti種族歧視，Kjersti急急於社交網澄清，話自己身為挪威人，母語並非英文，對於同樣非以英文為母語的秀賢，能於9歲左右睇得明英文版《哈利波特》，有感對方好勁，自言訪問中的追問，僅是單純驚嘆！不過有秀賢粉絲就搵到Kjersti於訪問中講到電影卡士時，都無提到秀賢，認為她堅唔尊重偶像！

另一方面，電影昨日於巴黎舉行首映，Ezra以全黑奇裝上陣，襯晒戲中與邪靈共存的角色，他另於訪問中講到小時因對性向曖昧而屢次被打，當中包括有男仔以為他是女孩子而咀他，最後發現真相就怒打他，相當坎坷。