【閃光彈】默契滿分！賴弘國爆阿嬌缺點係…

藝人鍾欣潼（阿嬌）孖老公賴弘國參與內地節目《爸媽學前班》，在最新一集中，兩人在日常生活方面顯得默契十足，睇到其他三對夫婦大嗌羨慕。例如食早餐時，口中塞滿食物嘅阿嬌噏咗幾句，賴弘國即刻知道老婆想點。飯量少嘅阿嬌只要一個眼神，賴弘國就變身「食物回收機」，即刻「回收」阿嬌食唔晒嘅飯餸。

讚賴弘國勁溫柔

喺姊妹淘下午茶時，阿嬌亦同大家分享佢同老公呢段感情嘅甜酸苦辣。阿嬌坦言賴弘國勁溫柔，唔會畀自己拎重嘢，冇佢喺身邊會勁唔習慣，而佢對病人嘅細心亦係自己心動嘅原因之一。

阿嬌又話自己從來都唔會同人嗌交，但係間唔中會同賴弘國嘈幾句，講到人生話題時，兩公婆有時會產生矛盾，阿嬌表示：「Michael是可以改變的，我等他長大。」而喺互動環節入面，心理學家叫四對藝人夫婦互相寫低對方嘅缺點，拎住支筆係咁寫嘅賴弘國直言：「雙手拿滿了東西時，阿嬌還會要求我幫忙『倒一杯水』！」當賴弘國要求阿嬌改進時，阿嬌就嘟晒嘴撒嬌：「沒辦法改，這是習慣啦～」互動Sweet到爆。