擒最強星二代　陳家樂嗒晒糖公開約林愷鈴

藝人陳家樂與「最強星二代」林愷鈴（Ashley）出席服裝品牌活動，二人接受訪問時，家樂全程化身「怕醜仔」，又不時望住Ashley冧笑，他笑話終於可以見到對方，認真是久仰大名：「都有聽到啲人話佢係最強星二代，覺得佢好好、好叻、好聰明、記性好好、笑容又好甜美。（好多個好字喎！）係呀！佢係幾好！」單呢一句說話就已經有8個「好」，看來家樂對Ashley大有好感。

問Ashley是否符合他的「條件」？家樂即怕醜話唔好，更自稱是叔叔：「係照顧啲小朋友，你哋唔好嚇親人，遲啲我會同佢媽咪（龔慈恩）一齊拍戲，之前都有拍過。」輪到Ashley「回禮」：「媽咪都話佢戲好、又靚仔！」二人互笠高帽，搞到家樂不禁大叫好緊張。

問Ashley之後可會去探媽咪班？家樂抵死搶答「都好呀」！而她都表示可以，不過要遷就返學時間，家樂即關心地問幾年級？得悉大學一年級後又說：「仲以為只係中三、四。（知道幾大啱唔啱？）唔會諗呢啲嘢啦！」轉頭又繼續「查家宅」追問Ashley幾多歲：「佢得18（歲），我30幾（歲）啦！（年齡唔係重點。）最近忙拍戲已經忘記呢啲事。（同人哋媽咪相處吓先！）係囉！同佢媽咪拍多幾年戲先。（行外母政策？）拍吓戲先啦！」家樂坦言好想合作拍戲。問是否想飾演情侶？他抵死話可以做兄妹，甚至是父女，當被催促搵女友時，他含羞邀請Ashley得閒去露營，二人互望冧笑，充滿粉色泡泡！

----------------------------

東網巨星開咗ig喇，大家快啲follow啦！

https://bit.ly/2JjSVcr