藍潔瑛追思會：曼玉送花籃！胞姐由親友陪伴

「靚絕五台山」的藍潔瑛離世令圈中人無不惋惜，其追思彌撒今晚舉行，其胞藍潔卿連日來為她辦理身後事，由於想低調處埋，胞妹遺體火化後，骨灰便直接送去聖安納天主堂內安放。藍潔瑛5年前於住所附近的聖亞納天主教堂領洗及獲名Maria，故今晚於教堂舉行安息彌撒，其姊於下午5時20到場，身穿牛仔衫褲的她，雖然戴了帽﹑墨鏡和口罩，包到實，起初冇表情，但在親友陪伴下，於場內為妹妹打點後，安坐於教堂聖殿內的第一行位置，而堂上右前方，放了藍潔瑛的遺照。其胞姊於此時終於冇再迴避鏡頭，神情表現輕鬆。安息彌撒上，約有2﹑30名記者到場探訪，亦有影迷獻花，影迷以內地人為主，他們於下午5時開始排隊進場，堂內見到影星張曼玉的花籃，而她的花籃送入內時被反轉了，放置側位看得不太清楚，而現場亦見有劉青雲夫婦和郭政鴻花籃。

有份送上花牌的翁虹現身在內地，她在電話中表示：「其實我同佢未合作過，但對佢印象最深，真係靚到好似仙女咁，佢仲係我哥哥第一個喜歡嘅女神，所以想表達自己少少心意，希望佢可以得到解脫，唔需要再活在痛苦中，在天家開始另一個快樂人生。」