60歲牛一　潘源良攬實太太放閃

「詞壇浪子」潘源良上個月喺加拿大低調迎娶女友Rita，展開人生新一頁。原來潘源良已經同太太返咗香港，並相約一班資深填詞人黃偉文、梁柏堅等一起慶祝其60歲生日。梁柏堅將相片上載到社交網，見到潘源良以一身Casual造型亮相，壽星公仲攬到太太實一實，相當恩愛。梁柏堅發文表示：「無論年資同年齡加輩份，我都係包尾嘅場合 #潘懸樑陸拾大壽 #生日歌你一定估唔到 #竟然點唱繼續追尋。」而黃偉文亦有喺社交網發文恭賀：「潘源良60大壽，詞人慶祝酒局，賀辭是『有咩留返（番）70歲先講』」。