喊功打動Apple　麥德羅箍煲成功大壽求婚？

下月「登六」的80年代舞王麥德羅，今年3月疑有「小三」，令相識30多年的女友劉麗萍（Apple姐）嗌分手，不過花了半年時間落力箍煲後，據知兩人上月秘密再復合！

「登六」擺大壽

麥德羅講過60歲就計劃求婚，日前他與女友現身尖沙咀一間酒樓，疑似商討結婚擺酒事宜！不過Apple表示只是打算為男友擺大壽。問到是否已和好如初？他們大耍花槍，全程肉麻互冧，麥德羅笑說：「佢突然間話唔捨得我喎！」Apple笑說：「咩呀！你唔係咁講，你仲話你好愛我，你係咁等我，喺我屋企樓下等幾個鐘！」桃花旺盛的麥德羅直認不少女粉絲得知他們分手後都很開心：「佢哋話Apple離開你，我哋可以代替，你畀機會我哋得㗎啦！」

自認耍花槍醜怪

Apple踢爆男友分手時變喊包，她說：「我前世欠咗佢，佢又喊，我又喊。佢好衰，見我唔睬佢，喊住自拍畀我睇，覺得佢好可憐，好驚佢跳樓死。」兩人再度復合，坦言會好好珍惜這段感情，Apple尷尬笑說：「我哋加埋百幾歲，但都似廿幾歲咁，我都覺得好醜怪！」而麥德羅承認性格熱情，見人就又攬又錫：「佢見到又唔鍾意，因為佢妒忌，我哋會互相包容、檢討。」Apple續指鄧英敏曾對她說：「佢話呢個孫悟空，你係觀音大使，你要以慈悲心待佢先得。我都要學吓，唔會再當眾鬧佢。」問到可會提早拉埋天窗？麥德羅說：「依家安排緊。（大壽嗰日求婚？）賣個關子先！」